Segun experto di WHO, nan ta splica e caminda mas probable cu e coronavirus a yega Wuhan

E comercio di ‘vida silvestre’ na China ta e caminda mas probable cu covid-19 por a propaga for di e fuente original, posibel di vleermuis pa humano, segun expertonan di World Health Organization.

E investigacion di WHO, realisa pa mas di un aña despues di e brote inicial, ta abou di un intenso investigacion. Algun cientifico y gobierno ta cuestiona e independencia di e estudio. Beijing ta acusa Washington y otro pa politisa e origen di e virus.

Siman pasa, ministerio di relacion exterior di China a duna un sesion informatibo pa diplomaticonan di e investigacion principal di WHO. Feng Zijian, subdirector di centro di control y prevenecion di malesa di China a bisa cu experto di ambos banda a examina cuatro posibilidad di con e virus a yega Wuhan.

Nan ta bisa cu e por ta via cuminda frozen, infeccion directo cu humano, infeccion na un bestia intermedio y fuga di laboratorio. Feng a bisa cu expertonan ta di acuerdo cu lo mas probable ta e virus a pasa di un ‘huesped intermedio’ vleermuis pa humano y cu ta extremadamente improbable cu e virus a keda filtra den un laboratorio.

Segun Daszak, experto di China y internacional a bisa cu e caminda mas probable cu e virus a tuma tabata di e vleermuis, despues a infecta un intermediario den un criadero di bestia di ‘vida silvestre’ zuid di China.

Despues e bestianan a wordo bendi na un mercado di Wuhan, unda cu ta kere a hunga un papel central di e propagacion di e malesa. Unda a detecta pa prome biaha un grupo cu casonan similar cu neumonia na december 2019.

Daszak y otro expertonan di WHO a bishita e mercado di Huanan y a wak cu no solamente nan ta bende shrimps, pero tambe producto di ‘vida silvestre’, cadaver di bestianan y bestianan bibo di diferente tipo.

E ekipo di WHO no tabata e prome grupo di cientifico cu a examina e mercado di Huanan, durante e brote inicial na Wuhan, cientifico di China tambe a bay eynan, pero ora cu nan a yega e tabata cera y mayoria di bestianan bibo a keda saca afo.

Sin embargo, cientificonan di China a tuma mas di 900 test, incluyendo test ambiental. Tur cadaver di bestianan cu a haya tabata negativo pa e virus. E informe tambe a establece un serie di recomendacion di locual mester haci pa obtene mas informacion di e origen di e virus.