Fundacion Centro di Pesca Hadicurari cu otro inversion mas pa nos piscadonan

E ranchonan di piscado na Colony cu capa di verf nobo en cooperacion cu Santa RosaColorido. Asina e ranchonan di piscado na Colony ta kedando awor cu nan a haña un capa di verf nobo. Despues di hopi tempo esakinan ta wordo pinta atrobe.

Esaki ta danki na e aporte di Fundacion Centro di Pesca Hadicurari, kende cooperando cu Santa Rosa, a provee materialnan necesario pa personal di e sección di pesca mantene e area y facilidadnan di e piscadonan.

Esaki riba peticion di Minister Chris Romero, kende tambe a pidi e fundacion Centro di Pesca Hadicurari cooperacion pa denter di poco drecha e staca cu ta sirbi e piscadonan como guia pa drenta den e bahia.

Directiva di Fundacion Centro di Pesca Hadicurari, bou guia di presidente Arthur Giel, ta contento di por aporta un biaha mas na yuda piscadonan y centronan di pesca rond Aruba. Den pasado e fundacion a aporta na completamente renoba piernan na Oranjestad (Rancho), Spaans Lagoen, Barcadera y Colony.

Ademas na Spaans Lagoen a remplasa varios rancho y converti esakinan den un centro moderno y organisa cu mas facilidad.Den futuro cercano por spera mas cooperacion cu Santa Rosa pa mehoracion di centronan rond Aruba y asina sigui cumpli cu su meta di yuda piscadonan di Aruba.