‘Prome biaha den gobernacion por mira maetronan, mayornan y sindicato ta keda protesta’

Awe durante un conferencia di prensa, parlamentario di fraccion di AVP sr. Arthur Dowers ta papia di asunto den enseñanza den e ultimo temponan. E ta bisa con por ta posibel cu minister concerni no ta den dialogo cu enseñanza.

E ta bisa cu pa prome biaha den un gobernacion ta mira cuando protesta ta bin dilanti di parlamento y bestuurskantoor. Caminda maestronan, sindicato y mayornan ta keda bin dilanti pa mustra nan malcontento pa locual ta trata enseñanza di nan yiunan.

Por mira durante e transcurso di gobernacion cu varios biaha sindicato a bin dilanti anto tene nan reunion cu e mandatario, expresando nan preocupacion den e cambio cu lo wordo tuma.

Segun sr. Dowers, e minister di enseñanza a trece peliger den e maneho di enseñanza y tabata kier manipula for di comienzo. E ta bisa cu e mandatario a kibra e sector y abusa di esaki caminda tur esnan involucra ta keda traumatisa di tur e hechonan.

“E ta terorisando un pueblo den parti di enseñanza. Nan no ta bay sigui tolera abuso. Pone e minister encarga den otro departamento, infraestructura of Santa Rosa, cu e por haci menos daño pero no cu yiunan di hende. E ta algo inhusto y inaceptabel.”