Parlamento Alan Howell: Varios bario a ser asfalta pero ainda falta mas

Parlamentario Alan Howell a entrega siman pasa un carta na Presidente di Parlamento cu e peticion pa un reunion publico cu tur minister presente. E tema principal ta desaroyo di pariba di brug den tur sentido.

Elaborando un tiki riba e parti di infrastructura, Howell ta comenta cu pariba di brug a haya atencion sigur den algun bario durante e gobernacion aki. Esaki tin di haber cu drempels y drechamento di careteranan y tambe asfalt den barionan.

Tur hende sa cu esaki a wordo logra tambe, entre otro, cu e insistencia constante di Parlamentario Howell. Segun Howell e ta compronde cu e virus di Covid a tranca hopi cos, pero ta ora pa sigui move awo si.

Riba peticion di habitantenan y deseo di parlamentario Howell kier logra haya asfalt den e siguiente barionan prome cu e gobernacion aki termina; Sabana Basora, Savaneta, Rooi Koochi Noord Cura Cabai, Rooi Master, Brazil, Pos Chikito y cayanan den barionan di San Nicolas.

Pabou di brug tambe falta atencion den algun bario, pero esey Howell lo enfoca despues tambe ariba dje. Finalisando, Alan Howell a bisa cu adelantando na e reunion publico, e ta cuminsa haci peticion pa e barionan menciona haya asfalt.