Awe ta dia pa celebra y sigui cuida nos salud

Awe 7 di april ta Dia Mundial di Salud! E fecha aki ta wordo conmemora mundialmente tur aña. Pa e aña aki Organisacion Mundial di Salud (OMS/WHO) a scoge e tema ‘Hunto pa un mundo mas husto y saludabel’.

Cu e tema aki OMS ta haci un yamada urgente pa elimina inigualdad y mobilisa accion pa un miho salud pa tur hende.Na Aruba nos por conta cu un seguro medico general, esta AZV, cu ta cubri e cuido medico di tur cuidadano residencia na Aruba sin distincion di rasa, edad y status.

Lastimamente esaki no ta e caso na hopi pais rond mundo. Tin miyones di persona cu no ta conta cu e beneficio aki y hopi biaha ta esnan mas pober. Banda di un seguro general, cuido propio ta sumamente importante pa mantencion di un bon salud.

Salud, sin duda ta nos rikesa di mas grandi. Tur inversion haci pa mehora y mantene bo salud y esun di bo famia ta un bon inversion.Instituto Biba Saludabel y Activo (IBiSA) conhuntamente cu Plataforma Promocion di Salud kier a enfatisa e importancia di sigui cuida y mehora bo salud specialmente den e periodo aki cu mundo y Aruba ainda ta den e gara di COVID-19.

Keda pendiente pa mas informacion di salud y con pa sigui ‘Boost bo defensa’ den media y media social di IBiSA y miembronan di Plataforma Promocion di Salud cu ta Departamento di Salud Publico, SVb, AZV, Hospital Dr. Horacio Oduber, FADA, WGK y IBiSA.

Hunto ban para keto un rato, awe riba Dia Mundial di Salud, pa aprecia y duna danki pa beneficionan cu nos tin na Aruba, y na mesun momento compromete nos mes pa sigui cuida nos salud y esun di nos famia.