Aeropuerto di Aruba ta cla pa agrega e siguiente capitulo na su historia: Fase 1A di Gateway 2030

Aeropuerto di Aruba ta cla pa agrega e siguiente capitulo na su historia: Fase 1A di Gateway 2030 por cuminsa oficialmente Aruba Airport Authority N.V. (AAA), ta cla pa bai cuminsa cu su proyecto grandi di reconstruccion ‘Gateway 2030’ diseña pa yuda cu e limitacionnan den capacidad, e experiencia di pasahero y e sostenibilidad cu Aeropuerto Internacional Reina Beatrix (Aeropuerto di Aruba) tin actualmente.

COVID a forsa Aeropuerto di Aruba pa pensa di nobo riba e forma di ehecucion di e proyecto ambicioso aki na comienso di aña 2020. Maneho di AAA bou di supervision di e Hunta di Supervision a dicidi di continua cu e ehecucion y inversion den Gateway 2030, aunke cu nos ta pasando den e crisis di COVID.

E mehoracion di e infrastructura di aeropuerto lo duna su resultado pa un largo plaso. E crisis di COVID, aunke e ta un golpi fuerte pa Aruba, lo ta un fenomeno temporario. Mirando esaki, a dicidi cu e ehecucion di e proyecto lo bai den fase.

Door di traha den fase lo yuda controla y maneha e ehecucion mihor y lo duna e oportunidad pa inlcui ideanan nobo den e siguiente fasenan di e proyecto cu lo dura varios aña. Awe, AAA ta anuncia publicamente cu e ehecucion di e prome fase lo cuminsa, e asina yama Fase 1A di Gateway 2030.

E Fase 1A di Gateway lo consisti di:

1) E construccion di un “baggage hall” nobo.

2) E implementacion di un “baggage handling system” nobo.

3) E expansion di e “check in hall” Mericano, acompaña pa

4)E coneccionnan necesario riba “airside” y “landside”. Pa duna apoyo na e economia di Aruba di e mihor forma a keda dicidi cu lo ehecuta e fase aki 100% localmente. Esaki ta nifica cu un “project venture” di 5 contratista Arubiano conhuntamente lo ehecuta e prome fase di Gateway 2030.

E project venture consistiendo di Albo Aruba NV, Bohama Aruba NV, Arubaanse Wegenbouw Maatschappij (AWM), Croon Caribe y CHS Technical Contracting and Trading Company N.V. a keda selecta pa haci e trabou y lo traha hunto bou di e nomber ‘ABC Project Venture’.

“Gateway 2030 Fase 1A lo haci uso di e ultimo den tecnologia y inovacion pa na final beneficia nos pasaheronan, haciendo nan experiencia mas liher y sin causa stress. E uso di ekipo biometrico y “self-service” den e check-in hall, acompaña cu e mihor sistema di “baggage handling” lo brinda un eficiencia significante na e operacion di aeropuerto, mientras cu ta mantene su mes na e nivelnan mas halto di safety, seguridad y sostenibilidad,” asina Sr. Shensly Tromp, AAA su Director of Development & Technology a comenta.

E obhetivonan di Fase 1A ta inclui:

1) Un proceso “sin contacto” y facil na check-in.

2) No lo ta necesario pa bolbe piki maleta ora di pasa pa US Pre-clearance.

3) E screening di seguridad secundario lo bira solamente pa esnan cu wordo selecta.

4) Transferencia “Tail-to-Tail”: Esaki lo permiti aerolineanan pa sigui reduci e tempo di haci coneccion na nan hubs.

5) E “LEED Gold certification” pa Fase 1A lo percura pa e proyecto ta construi y opera den un manera sostenibel y bon pa nos medio ambiente. “Durante tempo di crisis e ta esencial pa Gobierno y companianan sigui inverti den e economia local. Cu e comienso di e Fase 1A di e proyecto Gateway 2030, un inversion di 140 miyon dollar lo wordo haci, y lo genera mas di 200 empleo cu ta hopi necesario durante e temponan dificil cu nos ta pasando aden.

Obstante e diferente retonan, e proyecto aki lo continua y Aruba lo tin un di e mihor aeropuertonan den e region,” segun Aruba su Minister di Turismo Dangui Oduber. “Como companianan bon estableci na Aruba, nos ta hopi orguyoso y agradecido pa ta parti di e proyecto aki. Teamwork entre AAA, nos partnernan y otro stakeholdernan envolvi a haci posibel pa nos ta unda nos ta para awe.

Cu e recursonan combina, experticio local y conocemento di e partnernan di e ABC Project Venture, nos lo por ehecuta e proyecto aki. E proyecto aki no solamente lo contribui na e continuacion di nos negoshinan, pero na mes momento lo crea oportunidad pa varios otro “subcontractors” y “suppliers” y tambe lo stimula Aruba su economia.

Cu e realisacion di e proyecto aki nos lo alcansa un otro milestone na Aruba” segun Gerco Rijkers representante di ABC Project Venture.Segun e planning di Fase 1A di Gateway 2030, lo tin e groundbreaking na Juni di 2021.

E prome milestone lo wordo alcansa na Februari 2023 ora e edificio di e Baggage Handling lo keda completa. E di dos milestone lo wordo alcansa na Augustus di e mesun aña (2023) ora e check-in hall keda cla y e trabounan civil tambe keda finalisa.

Fase 1A completo lo wordo entrega door di ABC Project Venture na Aeropuerto di Aruba na Juli 2024. “Na final di dia e meta ta sali for di 2 di AAA su ambicionnan strategico pa contribui na e comunidad di Aruba y pa ta e Aeropuerto mas inovativo den Caribe.

Fase 1A di Gateway 2030 cu su “spin off” economico, e ambicion pa logra e certificacion LEED Gold y e sistema di baggage handling “state-of-the-art” ta un ehempel perfecto di con nos ta duna substancia na e ambicionnan aki. E fase di planificacion y diseño ta finalisa, awo ta momento pa ehecuta nos ambicionnan. Nos ta ansioso pa marca historia hunto!” segun CEO di AAA Joost Meijs.