Aña pasa tawatin diferente accion di control pa cu negoshinan y tambe taxistanan pa asina por ricibi nan Seyo di Oro. Departamento di Salud Publico y Task Force a bin ta haci diferente control na establecimento rond di nos isla.
E control aki ta percura cu tur negoshinan ta cumpliendo cu e protocolnan di higiena debidamente. Oficina di Turismo hunto cu diferente instancia a tene tres diferente accion di control cu a tuma luga pa cu e taxistanan brindando servicio na Aruba.
Por remarca cu un total di 114 taxista a wordo otorga e Seyo di Oro. Dos di e accion aki a tuma luga den un forma di sorpresa. E ultimo accion, a invita taxistanan pa nan mes por pasa y un total di 34 taxista a pasa pa control voluntario.
Den futuro cercano lo continua cu controlnan asina.Ademas kier a enfatisa cu Departamento di Salud Publico a sigui ta controla diferente establecimento y acomodacion durante e ultimo lunanan aki.
Un total di 296 acomodacion, 315 negoshi (retail), 395 restaurant incluyento Food Trucks, 67 supermercado y 10 casino a wordo controla y a ricibi nan Seyo di Oro exitosamente.Actualmente tin control riba acommodacion –cual ya ta den su fase final- y asina por enfoca riba otro sector.
Ademas, HHC ta haci un recordatorio na tur compania pa mantene nan mes na e protocolnan stipula cu actualmente ta na vigor:
• Haci uzo di hand-sanitizer of laba man frecuente
• Uzo di tapa boca pa bishitante como tambe coleganan trahando hunto• No mag di tin mas cu cuater adulto aglomerando
• Mantene un logboek di limpiesa.Nos ta pidi tur compania cu pa un of otro motibo no a registra ainda, pa please haci esaki ainda.
Por manda un e-mail na healthcode@aruba.com y asina lo comparti e lista di registracion. Un danki ta bay na tur compania cu ta mantene nan mes y cumpli cu e protocolnan di higiene pa asina hunto nos por combati contagio di e virus.
Leave a Reply