E tres mutacionan di e virus por hasi viahamento den avion mas riesgoso pa ser contagia

E mutacion nobo di covid-19 haya na Zuid Africa, Inglatera y Brasil ta 70% mas contagioso cu e prome virus di covid segun expertonan y esaki ta motivo di preocupacion pa e industria di aviacion y por afecta nos turismo si esaki realmente ta asina. Expertonan ta haciendo diferente estudionan di e tres mutación di covid pa asina mira con y con lihe e ta ser pasa di un persona pa otro. Nan ta pensa cu e crecemento den casonan na Merca tin hopi di haber cu e mutacionan nobo aki.

Merca a registra 249,945 caso average pa día den un siman y e number mas halto di morto desde cu e virus a yega Merca, 4400 persona a fayece riba un dia consecuencia di e virus. Expertonan na Merca ta calcula cu si e sigui asina nan lo surpasa 640 mil morto pa luna di Mei y lo por pasa e cantidad di mortonan di e pandemia di Influenza di aña 1918.