Entrante 18 di maart Aruba ta habri pa Peru y ta sera pa Zuid Africa

Crisis Team ta participa cu entrante otro siman diahuebs 18 di maart Aruba lo habri bek su frontera cu Peru mientras cu lo sera pa Sur Africa y permance sera pa Brazil y Venezuela. Tabata net un aña pasa cu Aruba mester a sera su frontera cu tur pais di mundo cu excepcion di Reino Hulandes, despues cu a detecta entrada di varios caso di e Covid-19 Corona Virus na nos isla.

E medida drastico aki combina cu varios otro medida y regla di comportacion a haci posibel cu Aruba a controla e pandemia y a limita impacto grandi cu e por tabata tin riba nos población.

Gradualmente durante di e lunanan cu a sigi a cuminsa habri bek frontera cu diferente paisnan bao di cierto condicionnan y control. Despues di a evalua e situacion na Peru cual a mehora, CrisisTeam awe por anuncia cu entrante 18 di maart lo habri frontera bek cu e pais Sur Americano. Esey kiermeen cu vuelonan directo ida y buelta di Peru of via otro paisnan cu Aruba ta habri cu nan, por tuma luga atrobe.