Parlamentario Endy Croes ta amplia riba deporte. Desde 13 di maart 2020 cu Covid 19 a hasi su entrada na Aruba esaki a causa cu deporte engeneral a wordo afecta enormemente. No obstante esaki Minister di Deporte Danqui Oduber tabata tinie hopi dificil desde november 2017 cu a tuma e cartera di deporte over.
Pa cuminsa si compara e periode di MEP 2001-2009 y AVP 2010-2017 por tuma nota cu tras di un vision y un maneho agresivo di Ramon Lee x minister di deporte 2001-2009 e tempo aya a inverti masha hopi na infrastructura y inversionan cuantioso den e atleta directo.
A logra construi cu placa di Lotto Stadion Frans Figaroa, Stadion Nadi Croes & Crismo Angela, comberti parke Jaburibari di un dump ( cu AVP a laga atras na 2001) pa un Parke multi funcional, a traha dos centro deportivo na Jara y Simeon Antonio, a traha dos parke di baseball na Pos chiquito, a renoba y drecha iluminacion na 15 cancha rond Aruba y banda di esaki a inverti 20 miyon den Federacionnan pa cu e Atletanan y Selecionnan directamente.
AVP sinembargo den periode (2010-2017) no a construi ni un solo facilidad, no a mantene e facilidadnan cu MEP a cosntrui pero a opta pa malgasta 10 miyon florin di deporte solamente na investigacion, abogado, companianan di investigacion.
Mas tristo ta cu a perde tur caso den beroep y cassatiie. Deporte por a usa e placa aki na otro forma. NO a mantene e stadionnan unda awe futbol por ehempel mester hunga weganan internacional den exterior, no a traha ningun facilidad y Lotto ta draai den problema cu mesun bestuur cu Mike De Meza y Mike Eman a instala desde e tempo aya.
Gobierno actual no tin grip riba Lotto:
Den historia tin graba cu desde 1982 a logra habri Lotto pa Deporte. Tras di vision di Betico Croes, Remy Zandaam y Roy van Putten e tempo aya a bin cu Lotto pa Deporte pa deporte por hanja su lugar den comuinidad unda placa di Loteria ta bay pa deporte y asina hasi deporte menos dependiente di gobierno.
Lamentablemente AVP a kibra esaki y a usa miyones pero miyones di Lotto na abogado, companianan di amigo y a kibra totalmente e essencia di Lotto. Na 2018 Danqui Oduber a bay corte cu Directiva di Lotto y a perde den corte. Pues Hues a considera cu e mesun personanan cu ya a sinta 8 aña por continua.
Net promer gobierno a cambia AVP a laga cambia Statutonan di Lotto unda e mesun miembronan di directiva te cu awe ta “gelijm” riba e stoel ey pa mas di 10 aña cual ta contra tur regla di “good governance”.
Pa e rason aki Minister di Deporte no a ricibi durante ultimo 4 aña ningun cooperacion di Lotto y mester tabata hopi creativo di otro forma pa logra brinda asistencia y ayudo na diferente organisacionnan deportivo.
Ley di Gaming Board:
Na Parlamento tin actual un ley cu a yega esta e ley di Gaming Board cual durante aña 2021 lo wordo trata. En todo caso muy pronto y promer cu september e mester ta kla. E ley aki lo trese oportunidad pa por bin cu un di dos loteria.
Esaki lo crea competencia sano. Gobierno aki hamas lo firma locual AVP a firma na 2011 den deseperacion unda nan a traspasa tur e poder y placa pa CBN Canada. Aruba awe ta na rudia y deporte sufriendo.
Cu un Lotto nobo Aruba lo conose competencia husto y unda tin competencia semper e pueblo ta sali benificia y den e caso aki deporte lo sali benificia.
Lo percura den e proximo gobernacion banda di bin cu un di dos loteria pa re-negosha e contracto cu CBN Canada pa un contracto fair y husto. Asina pueblo por mira y sinti bekl unda su placa ta bay. Por cumpra Lotto bek cu amor paso si Bo perde mes bo ta mira unda Bom placa ta bay entreotro na facilidadnan y e atleta.
E sentido aki ya no ta biba mas actualmente den pueblo. Lo traha duro pa restablese e confiansa den e pueblo cumprador y e contacto y efecto directo cu esaki tin cu e deportista. Cu Bo Nos ta Avansa!
Leave a Reply