A tene un entrevista cu PR di Departamento di Impuesto (DIMP), sra. Meverly Romano pa asina duna update di number di auto y cu partimento di boet a cuminsa for di dia 17 february 2021 pa esnan cu no a paga nan impuesto di number di auto.
Di parti di DIMP, e ta bisa cu kier sigui conscientisa comunidad pa haci nan pago na ora, por a mira cu e biaha aki nan a duna un oportunidad largo (simannan di extension) pa por paga nan impuesto, te cu a pone e fecha di dia 17 di february pa esnan cu ainda falta haci nan pago.
Sra. Romano ta splica cu mester tuma nota cu awo ora un persona haci nan pago sea di henter e aña tin cu paga un 150 florin di boet, pa esnan cu a paga solamente mita aña, mester paga 75 florin di boet y pa siguiente mita otro 75 florin di boet.
E ta bisa cu ta conoci cu a haya varios reaccion di comunidad caminda nan ta reclama cu ainda nan no a cobra of e ta mucho placa. E ta bisa cu di parti di DIMP tin comprension sinembargo DIMP tin a tarea pisa pa cumpli cu presupuesto do pais Aruba.
For di siman pasa, nan tabata tin un cumplimento di 69% den e pagonan di vehiculo di motor. Esey ta 61.480 number cu a keda paga sea mita of completo. E ta bisa cu DIMP ta agradecido cu esnan cu a haci nan pago manera debe ser y cumpli cu belasting di pais Aruba.
Di e numbernan cu no a paga ta un total di 26.197, ta un 29% (1/3 parti) cu tin y mayoria ta cay den categoria di plachinan A, esey ta un 20.939 auto cu mester paga, un 2855 auto di plachi V y un 844 pago di brommer. Nan ta spera pa esnan cu falta haci nan pago sin lubida e boet cu nan mester cumpli cune.
Pa esnan cu kier paga online, mester tene na cuenta cu e cantidad cu nan paga, ta bay prome den e sistema cu ta kita e boet pa despues e pago, dus ta importante pa yena e total manera mester ta sino e persona su pago ta keda habri.
“E persona ta registra e pago riba e boet, locual ta resta ta belasting, si e persona no haci esaki e ora no tin pago completo pa belasting. Mester tene cuenta cu esaki pa esnan cu ta haci pago online, esnan cu kier paga via banco lo mester paga e boet pa despues pasa e cantidad di placa”, e ta splica.
Pa finalisa el a bisa cu pa tur hende cu yena e pago online ta importante pa yena tres informacion, e persoonsnummer di e persona cu su number di auto ta registra na dje, nan lo mester pone e number di plachi completo por ehempel A-00000 y e persona su nomber di e auto cu ta registra na dje.
Leave a Reply